• பள்ளிப்பருவத்தில் இருந்தே மாணவர்கள் உடல் உழைப்புப் பயிற்சிகளை ஏற்படுத்திக் கொள்ள வேண்டும்.
• 60 வயதைத் தொட்டுவிட்ட யாவரும் மாரடைப்புக்கான எந்த அறிகுறியும் இல்லாவிட்டாலும் வருடத்துக்கு ஒரு முறையாகிலும், குருதியில் கொழுப்பின் அளவு, வெல்லத்தின் அளவு, ECG  போன்ற இருதயப் பாதிப்புக்களைக் கண்டறியும் பரிசோதனைகளை வைத்திய ஆலோசனையுடன் செய்து உங்கள் ஆரோக்கியத்தை உறுதி செய்யுங்கள்.
• குடும்பத்தில் இளவயது மாரடைப்பு பாதிப்புகள் இருப்பின் 25 வயதில் இருந்தே வருடாந்த பரிசோதனைகளைச் செய்து ஆரோக்கியத்தை மேம்படுத்துங்கள். வைத்திய ஆலோசனைக்கு அமைய உணவு, உடற்பயிற்சியைப் பின்பற்றுங்கள்.
• பெண்களுக்கு மாதவிலக்கு நின்ற பின்பு கூடிய கவனம் எடுங்கள்.
• சிக்கலான மாப்பொருள் உணவுகள் நல்லது. அதாவது நார்ப்பொருள் கூடிய மாப்பொருள் உணவுகள்.
  உதாரணம் – தீட்டாத அரிசி, சாமை, தினை போன்ற தானியங்கள் இலைக் கறிவகைகள், இனிப்புக் குறைந்த நார்ப்பொரள் கூடிய பழங்கள் ( தோடம்பழம், திராட்சை, கொய்ய, நாவல், விளாம்பழம்)
• உப்புக் குறைந்த, கொழுப்புக் குறைந்த, எண்ணெய் குறைந்த உணவுகள், பழங்கள், பச்சைக் காய்கறிகள் நிறைந்த உணவுகளை அதிகம் உண்ணுங்கள், இனிப்பான உணவுகளுக்கு பதிலாக விதைகள், பருப்புகள் உண்ணுங்கள்.  பேக்கரி உணவுகள், பாஸ்ட்பூட் ( Fast Food) உணவுகளைத் தவிருங்கள், கலோரி அதிகம் உள்ள உணவுகளையும் தவிருங்கள்.
• சிகரெட் குடிப்பது, புகையிலை போடுவது அளவுக்கு அதிகமான மது அருந்துதலை தவிர்த்தல்.
• எடை கூடுதலாக உள்ளவர்கள் அதைக் குறைக்க முயற்சி செய்யுங்கள். எடை கூடினால் உயர் இரத்த அழுத்தம் வருவதற்கு வாய்ப்பு உண்டு. இது இதய நோய் மாரடைப்பு வருவதற்கான முதற்படியாகும்.
• வயிற்றுப் பகுதியில் கொழுப்புள்ளவர்கள் அதனைக் குறைப்பதற்கு உணவுக் கட்டுப்பாடு, உடற்பயிற்சி செய்வது அவசியம். ஆண்களுக்கு இடுப்புச் சுற்றளவு 102 cm இலும் குறைவாகவும் பெண்களுக்கு 88cm இலும் குறைவாகவும் வைத்திருப்பதற்கு முயற்சி செய்ய வேண்டும்.
• உணவில் நிரம்பிய கொழுப்பு உணவுகளைத் தவிருங்கள் ( SATURATED FAT)
  உதாரணம் – பட்டர், நெய், சீஸ், விலங்கு கொழுப்பு உணவுகள், தேங்காய் எண்ணெய், மரக்கறி எண்ணெய், இவற்றில் பொரித்த உணவுகள்,
  கூடியளவு நிரம்பாத கொழுப்புணவுகளைப் ( UNSATURATED FAT)  பாவியுங்கள்
  உதாரணம் – ஒலிவ் ஒயில், சூரியகாந்தி எண்ணெய், நல்லெண்ணெய் போன்றன.
• குருதியில் கொலஸ்ரோலின் அளவு 200mg/dl க்கு குறைவாக பேண முயற்சிக்க வேண்டும். அத்துடன் HDL நல்ல கொலஸ்ரோலின் அளவு 45mg/dl க்கு அதிகமாகவும் LDL குறை அடர்த்திக் கொழுப்பு புரதம் 130mg/dl க்கு குறைவாகவும், ரைகிளிசைரைட்டு அளவு 150mg/dl க்கு மேல் அதிகரிக்காமலும் இருக்க வைத்திய ஆலோசனையுடன் உணவுப்பழக்கம், மருந்துகள், உடற்பயிற்சிகள், மூலம் குருதியில் கொழுப்பின் அளவைச் சீரான அளவில் பேண முயலுங்கள்.
• கட்டுப்பாடற்ற நீரிழிவு நோயும், உயர் இரத்த அழுத்தமும் இருந்தால் மாரடைப்பு ஏற்படுவதற்கான வாய்ப்பு இருக்கின்றது. வைத்தியரின் ஆலோசனையுடன் உணவு, மருந்துகளுடன் இந்த நோய் நிலைகளைச் சீரான நிலையில் பேணுங்கள்.

எஸ்.சுதாகரன்
நீரிழிவு சிகிச்சை நிலையம்
போதனா வைத்தியசாலை
யாழ்ப்பாணம்