சுவாச நோய்களைத் தடுப்போம்
தற்போதைய உலகில் இறப்பு வீதத்தைத் தீர்மானிக்கும் முக்கிய காரணிகளில் நீண்டகாலத்துக்குரிய சுவாச நோய்கள் (வருடத்திற்கு நான்கு மில்லியன்) விளங்குகின்றன. அதிகரித்த புகையிலைப் பாவனை, ஆரோக்கியமற்ற உணவுப்பழக்கம், சரீர உழைப்பின்மை மற்றும் அதிகரித்த மது பாவனை என்பவையே இந்த நோய்களின் தூண்டற் காரணிகளாக அமைகின்றன.
பொதுவான சுவாச நோய்களாவன
- மூக்கிலிருந்து நீர் வடிதல்
- தடிமன் அல்லது ஜலதோஷம்
- கக்குவான் இருமல்
- மார்புச்சளி நோய்
- சுவாசக்குழாய் அழற்சி
- ஆஸ்துமா
- நியூமோனியாக் காய்ச்சல்
- கசம்
- சன்னி
- சுவாசப்பை புற்றுநோய்
பொதுவாகச் சுவாச நோய்கள் கீழ்வரும் காரணிகளால் ஏற்படுகின்றன
- ஒவ்வாமை – மகரந்தமணி, தொழில்சார் உணர்திறன்கள், தூசித்தெள்ளு, சில மருந்துப் பொருள்கள்
- நுண்ணங்கித்தொற்று – பக்ரீரியா (குக்கல், கசம், ஈர்ப்புவலி), வைரஸ் (தடிமன், சுவாசக்குழாய் அழற்சி)
- புகைப்பிடித்தல் (சுவாசப் புற்றுநோய்)
- மனஅழுத்தத்தால் தூண்டப்படுதல் (ஆஸ்துமா)
- சில நோய்கள் பரம்பரையாகக் கடத்தப்படக்கூடியவை (ஆஸ்துமா)
- அன்னியப் பொருள்களை உள்ளெடுத்தல்
- குளிர்கால நிலை
- ஆரோக்கியமற்ற உடற்பயிற்சி
- ஆரோக்கியமற்ற உணவுப்பழக்கம்
சுவாச நோய்களைத் தடுக்கவும் நோய்க்குரிய சமூகத்திலிருந்து எமக்கு பரவாது தடுப்பதற்குமான வழிமுறைகளாவன…
- இருமும் போதும், தும்மும் போதும் மூக்கு, வாய்ப்பகுதிகளைக் கைக்குட்டையினால் மூடிக்கொள்ள வேண்டும்.
- கண்ட இடங்களில் துப்புவதைத் தடுத்தல் இல்லது தவிர்த்தல் வேண்டும்.
- நோயாளிகளால் ஆரம்பத்திலேயே இனங்காணப்பட்டுச் சிகிச்சை பெற வேண்டும்.
- சிகிச்சை பூரணப்படுத்தப்பட வேண்டும்.
- குடும்ப உறுப்பினர்களுக்கான மருத்துவப் பரிசோதனை (அவசியமான நோய்களுக்கு அனைத்துக் குடும்ப உறுப்பினர்களும் பரிசோதனையைச் செய்து கொள்ள வேண்டும்) (கசம்)
- புகைத்தல், மதுப்பாவனை போன்றவற்றை இயன்றளவு தவிர்த்தல்.
- சமையலின் போது புகை வெளியேறுவதை இயன்றளவு தடுத்தல்.
- நல்ல காற்றோட்டமும் சூரிய ஒளியும் உள்ள இடங்களில் வாழ்தல்.
- எமது போசாக்கு நிலையையும், நோய் எதிர்ப்புச் சக்தி நிலையையும் நன்கு பேணுதல் வேண்டும்.
- வக்சின்கள் மற்றும் தடுப்பூசிகள் உரிய நேரத்தில் போட்டுக்கொள்ளப்பட வேண்டும். (BGG குக்கல்)
- நோயாக்கியின் வாழ்தகவு கூடிய காலநிலை மாற்றங்களின் போது கால நிலைக்கேற்றவாறு எம்மை இசைவுபடுத்திக்கொள்ள வேண்டும்.
- காசநோயாளிகளாயின் அவர்கள் உரிய சிகிச்சையை முழுமையாகப் பெறுவதுடன், நோயாளியின் சளி சேகரிக்கப்பட்டு புதைக்கப்பட அல்லது எரிக்கப்பட வேண்டும்.
- மனப்பயிற்சிகள், சுவாசப்பயிற்சிகள் என்பவற்றில் ஈடுபடுவதன் மூலம் மனஅழுத்தத்தைக் குறைக்க முயலுதல் வேண்டும்.
- சளி மற்றும் சுவாசச் சுரப்புகளுடன் கையாண்டு முடிந்த பின் கைகளைச் சவர்காரமிட்டுக் கழுவுதல்.
- வாய்ச்சுகாதாரம் மற்றும் தோல் சுகாதாரத்தைப் பேணுதல் வேண்டும்.
சுவாச நோய்கள் பொதுவாகக் காற்று வழியான பரவுகையைக் கொண்டிருப்பதோடு, அவை சிறந்த சுகாதாரப் பழக்க வழக்கங்கள் மூலம் முழுமையாகக் கட்டுப்படுத்தக்கூடியவை. எனவே, சிறந்த சுகாதாரப்பழக்க வழக்கங்களை நடைமுறைப்படுத்துவதன் மூலமும் நோய்களுக்கான உரிய சிகிச்சைகளை முழுமையாகப் பெறுதல் மூலமும் சுவாச நோய்களை இல்லாதொழிப்போம்.
செல்வி. க.யாதவனி,
மருத்துவபீட மாணவி
Posted in கட்டுரைகள்